حاجة تشل وتقرف جدااا لما تلاقي في ظل الظروف اللي بتمر بيها مصر، واللي مش بتحصل كل يوم طبعا، ناس لسه كل اللي بتفكر فيه انها تتابع أخبار الممثلين والمطربين وستار أكاديمي، وشايفين أن ده أهم بكتير جدا من أنهم يتفرجوا حتي علي نشرة الأخبار ويعرفوا أيه اللي بيحصل في بلادهم ورايحين علي فين وأيه اللي بيهددنا و....و...و..... إلخ إلخ إلخ.
هو ده كان هدف مبارك ونظامه بأكمله، أن الشباب في كل أعماره يفضل مغيب عن كل شئ بيحصل حواليه، يفضل بس مهتم مين أتجوز مين، ومين طلق مين، الممثلة الفلانية أخدت كام، وجابت ملابسها من أي دار أزياء، وحاجات في منتهي التفاهة والهبل من نفس النوع. كل ده طبعا عشان نفضل راجعين لورا، محدش يفكر في شئ للأحسن ولا يفكر مجرد تفكير في السياسة، وأهلها وأيه اللي هما بيعملوه فينا، نفضل نايمين كددددددددده، لحد ما يطلعلك فجأة ضريبة ما أو قرار ما تلاقي نفسك قدامه وجها لوجه، وما عليك سوا أنك تقبله غصب عنك، ومتعرفش هو القرار ده طلع فين وأمتي وأزاي وأنت كنت فين أصلا من كل ده. حالة النووووم دي مبارك كان عايزها تفضل موجودة عشان تفضل السرقة شغالة صبح ليل، في كل مكان صحراء كان أو بستان، عشان محدش يبقا عارف حاجة في أي حاجة، وفي الأخر يبقا المحروس رئيس مصر ونشرب أحنا الفنجان وزوبعته. لو نزلت الشارع واخدت مجموعة من الناس كعينة وسألتهم عن معني الليبرالية أو الأحكام العرفية أو الحكومة الإتلافية، بنسبة 90% محدش هيديك اجابة صح. مازلنا عايشين في المستنقع القذر اللي مبارك عمله ووقع مصر كلها فيه، منهم اللي رفضه وتمرد عليه وحاول يبرز قدراته وفي الأخر النظام أداه علي دماغه فأخدها من قاصرها وسافر لبلد تانية بتقدر اللي يشتغل وبيفكر، وفي اللي فضل قاعد يحاول ويعافر لحد ما قامت الثورة.
في حاجتين أحب أقولهم، أول حاجة: أن المفروض الثورة حصلت لأنها كانت رفض بشكل واضح وصريح للتخلف وللظلم والقهر اللي كنا عايشين فيه، وأصبح في فرصة أنك تقول رأيك بجد، وأنك تحس أن رأيك أو صوتك في أي انتخابات أو إستفتاء يفرق فعلا، مش زي زمان، مبارك كان مريحك علي الأخر، كان بينتخبلك وأنت في بيتك وحتي وأنت ميت مكونتش حاتل هم، صوتك كان موجود أوتوماتيكي يا مرسي، أصل البطاقة الإنتخابية البطالة نجسة بعيد عنك. والمفروض دلوقتي بقا أنك تشتغل وتتعلم عشان تبني ما أفسده مبارك ونظامه وأولاده والسيئة الاولي عبر ثلاثة عقود مظلمة بمعني الكلمة، ولو مش هتبني دلوقتي يبقا أنسي خالص أنك هتتقدم، لأ أنت ممكن ترجع لورا أكتر ما مبارك كان مرجعك لورا.
ثاني حاجة وهي: أن في ناس لسه مافقتش، الثورة مأثرتش فيهم،محسسني أنها كانت عبارة عن شوية مظاهرات والسلام، في ناس من أول يوم في الثورة وهما بقوا بياكلوا ويشربوا ويستحموا كمان سياسة عايزين يفهموا أيه بيحصل حواليهم، صحيوا من اللي كانوا فيه، حسوا ولأول مرة أن البلد دي بلدهم، مش مجرد كلمة مصري مكتوبة في البطاقة أو الباص بوور، مبقتش مستعر أنك تقول " أنــــا مصــــــري "، أيام مبارك كنت بتلعن أنك مصري، لما تلاقي بلاد أيام ما كانت بلدك في أوج حضارتها كانوا هما لسه فوق الشجر.
محدش هيقولك فوق، محدش هيقولك أتعلم، محدش هيقولك أشتغل....حتي الدول اللي مبهورة بينا دي قادتها أصلا مش مبسوطين بالثورة زي ما هما بيكذبوا علي شعوبهم، لأن طالما الشعب فاق يبقا مش هيقدروا يلعبوا بيه زي الأول، وأي حاجة هنقول رأينا ونعترض ونتظاهر، زي ما حصل يوم الجمعة 8 أبريل، لما ألاف الشباب أتظهروا قدام السفارة الإسرائيلية وحرقوا العلم الإسرائيلي، طبعا مكنش حد يقدر يعمل كده أيام مبارك.
فوق وأتعلم وأشتغل وأبني بلدك لو مش عشانك فعشان أولادك وأحفادك، تخيل بعد 50 سنة لما أحفادك يسألوا يا جدو أزاي بنيتوا البلد دي هتفتكر الأيام دي كذكريات جميلة مش مؤلمة، هي مؤلمة فيأولها لكن بعد كده جميلة جدااا.
